ရှာဖွေရလွယ်ကူတဲ့ ကွန်ရက်များ ဖန်တီးခြင်း

 အခု သင့်ရဲ့ ကွန်ရက် စာမျက်နှာကို တည်ဆောက်ပြီးသွားပါပြီ၊ လူတွေက လာရောက် ကြည့်ရှုအောင် လုပ်ဆောင်ဖို့ လိုသေးတယ်။ Search engine optimisation (SEO) ဆိုတာ ကွန်ရက် စာမျက်နှာတွေကို ရှာဖွေရေး အင်ဂျင်တွေက ရှာဖွေ တွေ့ရှိနိုင်အောင် လုပ်ဆောင်ပေးတဲ့ လုပ်ငန်းစဉ် တခု ဖြစ်ပြီး သင့်ရဲ့ ကွန်ရက် စာမျက်နှာတွေကို လူတွေက ပိုပြီး ကြည့်ရှုလာအောင် တိုးမြှင့်လုပ်ဆောင်ပေးတယ်။

ကွန်ရက် စာမျက်နှာကို လူတွေက ကြည့်ရှုလာအောင် ဆွဲဆောင်မှု ပေးနိုင်တဲ့ အကောင်းဆုံး နည်းလမ်း ကတော့ Google လို ရှာဖွေရေး အင်ဂျင် တခုခု အသုံးပြုခြင်းပဲ ဖြစ်တယ်။ ရှာဖွေရေး အင်ဂျင်တွေကို အသုံးပြုပြီး လူတွေက ရှာဖွေလိုတဲ့ အကြောင်းအရာတွေကို အင်တာနက်ပေါ်က search field ထဲမှာ သော့ချက် စာလုံး တခုခု (သို့) စာကားစု တခုခုကို  ရေးထည့် ရှာဖွေနိုင်တယ်။ ဒီရှာဖွေရေး အင်ဂျင်ဟာ ကွန်ရက်စာမျက်နှာတွေပေါ်မှာ ပါတဲ့ မာတိကာထဲက အဓိက စကားလုံးကို နှိုင်းယှဉ် ရှာဖွေပေးပြီး ဆီလျှော်မှု အရှိဆုံး ကွန်ရက် စာမျက်နှာတွေကို ဖေါ်ပြပေးတာ ဖြစ်တယ်။

ရှာဖွေရေး အင်ဂျင်တွေရဲ့ အလုပ်လုပ်ပုံ အမျိုးမျိုး ရှိကြသလို လုပ်ငန်း တွက်ချက်ပုံမှာလည်း မတူညီတဲ့ ကိုယ်ပိုင် နည်းလမ်းတွေ ရှိကြတယ်။ ကမ္ဘာ့ လူသုံးအများဆုံး Google ဟာ crawler-based ရှာဖွေရေး အင်ဂျင် တခု ဖြစ်တယ်။ ဆိုလိုတာက အင်တာနက်ပေါ်မှာ သော့ချက် စာလုံးတွေနဲ့ ကိုးကားချက်တွေကို စုဆောင်းနိုင်ဖို့ 'crawls' လုပ် (ရှာဖွေ) ပေးပြီး၊ ရှာဖွေ တွေ့ရှိချက်တွေကို ရှာဖွေတဲ့သူဆီ ပေးပို့လိုက်တာ ဖြစ်တယ်။ Google ဟာ ကွန်ရက် စာမျက်နှာတွေ ပေါ်လာမဲ့ အစီအစဉ် ပုံစံကို အဆုံးအဖြတ် ပေးတဲ့နေရာမှာ ရှုပ်ထွေးတဲ့ စံညွှန်းတွေကို အသုံးပြုထားတယ်။ အဲဒီ စံညွှန်းတွေရဲ့ အထူးခြားဆုံးကတော့ သင့်ရဲ့ ကွန်ရက် စာမျက်နှာဟာ တခြား ကွန်ရက် စာမျက်နှာတွေနဲ့ အပြန်အလှန် ချိတ်ဆက်ထားသလား မချိတ်ဆက်ထားဘူးလား ဆိုတဲ့ အချက်ပဲ ဖြစ်တယ်။

တခြား စံညွှန်းတွေကတော့ ရှာဖွေရေး ဝေါဟာရ စာလုံးတွေ ပါမပါ ဆိုတဲ့အချက်ပဲ ဖြစ်တယ် -

• ဒိုမိန်း အမည်ထဲမှာ
• ခေါင်းစဉ်နဲ့ ဖေါ်ပြချက် စာတန်းတွေထဲမှာ
• ခေါင်းစည်းတွေထဲမှာ
• စာမျက်နှာမှာ ပါတဲ့ စာသား တနေရာရာမှာ

Google ဟာ ရေပမ်းအစားဆုံး ရှာဖွေရေး အင်ဂျင် ဖြစ်တယ်။ Yahoo နဲ့ Altavista တို့လို တခြား ရှာဖွေရေး အင်ဂျင်တွေ အများအပြား ရှိနေသေးတာကိုလည်း သိရှိထားပါ။ အဲဒီ ရှာဖွေရေး အင်ဂျင်တွေဟာ ယုတ္တိဗေဒ အမျိုးမျိုးကို အသုံးပြုထားကြတယ်။ ဥပမာ အားဖြင့်၊ Open Directory project လို ရှာဖွေရေး အင်ဂျင်တွေဟာ 'လူသား စွမ်းအင်စနစ်' ဖြစ်ပြီး တင်သွင်းချက်တွေ (entries) ကို လူတဦးချင်းက လုပ်ဆောင်ရတယ်။ အယ်ဒီတာတွေက ဖန်တီးတဲ့ တင်သွင်းချက်တွေလည်း ပါဝင်တယ်။

ဒီအပိုင်းမှာ အကြောင်းအရာတွေကို ရှာဖွေရေး အင်ဂျင်တွေကနေ ရှာဖွေတွေ့ရှိနိုင်တဲ့ အခွင့်အလမ်းကို တိုးမြှင့်ပေးတဲ့ နည်းလမ်းတွေကို တင်ပြထားတယ်။ ရှာဖွေရေး အင်ဂျင် အမျိုးမျိုးမှာ ကွန်ရက် စာမျက်နှာတွေအပေါ် သူတို့ ဦးစားပေး ဖေါ်ပြလေ့ရှိတဲ့ ယုတ္တိဗေဒတွေ အမျိုးမျိုး ရှိကြတယ်။ ဒါကြောင့် သူတို့ ဘယ်လို အလုပ်လုပ်ကြတယ်၊ ဘယ်ဟာကို အဓိက ထားကြတယ် စတဲ့ အချက်တွေကို သိထားဖို့ လိုတယ်။ Google လို ရှာဖွေရေး အင်ဂျင်တွေမှာ ၀ယ်ယူလိုတဲ့ ပစ္စည်းတွေနဲ့ ပါတ်သက်တဲ့ သတ်မှတ်ချက်တွေ အမျိုးမျိုး ရှိပေမဲ့၊ အဲဒီ နည်းလမ်းတွေ မသုံးပဲ၊ အဆင့် သတ်မှတ်ချက် ပိုမို မြင့်မားလာအောင် သင့်ရဲ့ ကွန်ရက် စာမျက်နှာကို သင့်မြတ်စေနိုင်တယ်။

အကယ်လို့ သင့်အဖွဲ့အစည်း ကွန်ရက် စာမျက်နှာကို ပြင်ပက ကန်ထရိုက်တာ တယောက်ယောက်က တည်ဆောက်ပေးနေတယ် ဆိုရင်၊ ရှာဖွေရေး အင်ဂျင် သင့်မြတ်စေဖို့ (optimisation) အတွက် ငွေကြေး ပိုမို တောင်းခံလာနိုင်တယ်။ ဒါပေမဲ့ သင့်ရဲ့ ကွန်ရက် စာမျက်နှာကို ပင်မ ရှာဖွေရေး အင်ဂျင်တွေဆီ တင်သွင်းတဲ့အခါ အချိန်သိပ်ကုန်မှာ မဟုတ်ဘူး။ အဖွဲ့အစည်းရဲ့ ဆက်သွယ်ရေး နည်းဗျူဟာကို တည်ဆောက်တဲ့အခါ သင့်ရဲ့ နယ်ပယ် အကြောင်းကို အထူး သိကျွမ်းထားဖို့ လိုအပ်တယ်။ အတွင်းလူ တယောက်အနေနဲ့ ဒါကို လုပ်ဆောင်ဖို့ သင်ဟာ အသင့်တော်ဆုံးဖြစ်တယ်။

မိမိရဲ့ ကွန်ရက် စာမျက်နှာကို Alltheweb နဲ့ Google စတဲ့ ရှာဖွေရေး အင်ဂျင်တွေမှာ တင်သွင်းနိုင်တယ်။

ကွန်ရက် စာမျက်နှာကို ဘယ်သူတွေက ကြည့်ရှုကြသလဲ။

ကွန်ရက် စာမျက်နှာရဲ့ အောင်မြင်မှုကို အတိအကျ တိုင်းတာပေးနိုင်တဲ့ နည်းလမ်း ကတော့ ကွန်ရက် စာမျက်နှာရဲ့ statistics လို့ ခေါ်တဲ့ စာရင်းဇယားနဲ့ လာရောက် ကြည့်ရှုသူတွေရဲ့ လှုပ်ရှားမှုကို လေ့လာတာ ဖြစ်တယ်။ အဲဒါဟာ သင် ဘာတွေ လုပ်ဆောင်နေတယ်၊ ဒီထက် ပိုကောင်းလာအာင် ဘာတွေ လုပ်ဆောင်ဖို့ လိုအပ်တယ် စသဖြင့် တကယ် အကျိုးရှိတဲ့ နည်းလမ်း တမျိုး ဖြစ်တယ်။ ဒါကို လုပ်ဆောင်တဲ့ နေရာမှာ သုံးစွဲတဲ့ ကိရိယာကို ကွန်ရက် စိစစ်လေ့လာရေး ကိရိယာများ (web analysis tools) လို့ ခေါ်တယ်။ ဒါတွေကို လုပ်ဆောင်ပေးတဲ့  Google Analytics နဲ့ Woopra တို့လို အခမဲ့ ကိရိယာ မျိုးစုံ ရရှိနိုင်တယ်။

အရေးအကြီးဆုံး စစ်ဆေးရမဲ့ အချက်ကတော့ လာရောက် ကြည့်ရှုသူ အရေအတွက် (သို့) သီးခြား ကြည့်ရှုလာသူ အရေအတွက် အနေအထား ဖြစ်တယ်။ ဒီကိန်းဂဏန်းက ကွန်ရက် စာမျက်နှာတခုကို လာရောက်ကြည့်ရှုတဲ့ ပရိသတ် အနေအထားကို အတိကျဆုံး ဖေါ်ပြပေးတယ်။ ကွန်ရက် စိစစ်လေ့လာချက် ဆိုတာ ကွန်ရက် စာမျက်နှာ တခုခုကို ထိနှိပ်တဲ့ အရေအတွက်ကို ဖေါ်ပြတာ ဖြစ်တယ်။ ဒါပေမဲ့ ဒီအရေအတွက်ဟာ စာမျက်နှာ တခုချင်းကို ရေတွက်တာ မဟုတ်ပဲ၊ အဲဒီအထဲမှာ ရှိတဲ့ အချက်အလက် တခုစီအပေါ် ထိနှိပ်ချက်တွေကို ရေတွက်တာ ဖြစ်တဲ့အတွက် ကွန်ရက် စာမျက်နှာ တခုရဲ့ ထင်ပေါ်ကျော်ကြားမှုကို အလွန်အကျွံ ခန့်မှန်းမိနိုင်တယ်။

ကွန်ရက် စာမျက်နှာ စာရင်းဇယား (statistics) ထဲမှာ ဖေါ်ပြတဲ့ တခြား အချက်အလက်များ -

 

• ရည်ညွှန်းပေးတဲ့ ရှာဖွေရေး အင်ဂျင်များ - ကွန်ရက် စာမျက်နှာ ရှိတဲ့နေရာကို လွှဲပြောင်းပေးတဲ့ ရှာဖွေရေး အင်ဂျင်တွေရဲ့ အသေးစိက် အချက်အလက်များ
• ရည်ညွှန်းပေးတဲ့ သော့ချက် စာလုံးများ - ကွန်ရက် စာမျက်နှာကို ရှာဖွေတဲ့နေရာမှာ သုံးစွဲတဲ့ သော့ချက် စကားစုတွေရဲ့ အသေးစိတ် အချက်အလက်များ။ အကယ်လို့ သုံးစွဲသူတွေက ကွန်ရက် စာမျက်နှာ အကြောင်းအရာ (သို့) metadata (ကွန်ရက် စာမျက်နှာ အကြောင်း ဖေါ်ပြတဲ့ သော့ချက် စာလုံးများ) မှာ အသုံးမပြုတဲ့ သော့ချက် စာလုံးတွေကို သုံးပြီး အကြောင်းအရာကို ရှာဖွေနေကြတယ် ဆိုရင်၊ သူတို့သုံးတဲ့ အဲဒီ အချက်အလက်တွေကို သော့ချက် စာလုံး အသစ်တွေအဖြင့် နောက်ပိုင်းမှာ ထည့်သွင်းနိုင်တယ်။
• လစဉ် သီးခြား ကြည့်ရှုတဲ့ အကြိမ် - ဒီလို ကြည့်ရှုတဲ့ အကြိမ်ကို လစဉ်အတိုင်းအတာနဲ့ စောင့်ကြည့်ပြီး ရှာဖွေရေး အင်ဂျင်ရဲ့ ရည်ညွှန်းချက် အရေအတွက်နဲ့တကွ ယှဉ်ပြီး တိုင်းတာ တာဟာ ကောင်းမွန်တဲ့ အလေ့အကျင့် တခု ဖြစ်တယ်။ ဒီနည်းနဲ့ လာရောက် ကြည့်ရှုလာတဲ့ သူတွေဟာ ကွန်ရက် စာမျက်နှာ အကြောင်းကို သိထားတဲ့ လူတွေ ဟုတ်မဟုတ် (သို့) ရှာဖွေရေး အင်ဂျင် တခုခုကို အသုံးပြုပြီး လာရောက်တဲ့ သူတွေ ဟုတ်မဟုတ် ခွဲခြား သိရှိနိုင်တယ်။
• ကွန်ရက် လမ်းကြောင်းများ (အ၀င် & အထွက်) - ဒီနေရာမှာ ကွန်ရက် စာမျက်နှာ တခုချင်းကို ၀င်ရောက် ကြည့်ရှုလာသူတွေနဲ့ စာမျက်နှာ တခုချင်းကနေ ထွက်ခွာသွားတဲ့ သုံးစွဲသူတွေရဲ့ အရေအတွက်တွေကို ဖေါ်ပြထားတယ်။ ဥပမာ အားဖြင့်၊ အကယ်လို့ ကွန်ရက် စာမျက်နှာပေါ်က ပင်မ စာမျက်နှာကို အကြိမ် ၁၀၀ အ၀င်ပြပြီး၊ ဒီ့ပြင် စာမျက်နှာကို သုံးစွဲသူ ၁၀ ဦးက ဆက်လက် ကြည့်ရှုနေကြတယ် ဆိုရင်၊ လာရောက် ကြည့်ရှုသူ အယောက် ၉၀% ကို ဆုံးရှုံးသွားတဲ့ သဘော သက်ရောက်နေမှာ ဖြစ်တယ်။

 

Metadata

Metadata ဆိုတာ ကွန်ရက် စာမျက်နှာ အကြောင်းကို ဖေါ်ပြဖို့ အသုံးပြုတဲ့ စာတန်း (tags) အစု တခု ဖြစ်တယ်။ အဲဒီအထဲမှာ စာရေးတဲ့သူ၊ ဖန်တီးတဲ့ နေ့စွဲ၊ စာမျက်နှာရဲ့ အကြောင်းအရာ၊ ပါဝင်တဲ့ အကြောင်းအရာတွေ ထင်ဟပ်စေတဲ့ သော့ချက် စာလုံးတွေ စတဲ့ အချက်အလက်တွေ ပါရှိတယ်။ Firefox (သို့) Internet Explorer လို အင်တာနက် browser တခုခုက metadata ကို ဖေါ်ပြပေးမှာ မဟုတ်ဘူး။ ဒါပေမဲ့ အဲဒီ စာမျက်နှာကို ဖွင့်လိုက်တဲ့ ကွန်ပျူတာ ကတော့ ဖတ်ရှုနိုင်မှာ ဖြစ်တယ်။ ရှာဖွေရေး အင်ဂျင် အတော်များများဟာ သူတို့ရဲ့ ကွန်ရက် စာမျက်နှာပါ မာတိကာတွေကို ဖန်တီးရာမှာ metadata ကို အသုံးပြုကြတယ်။

ကွန်ရက် စာမျက်နှာမှာ ပါရှိတဲ့ စာမျက်နှာတိုင်းမှာ အောက်ပါ metadata ပါဝင်ရမှာ ဖြစ်တယ် -
 

• Title tag – ကွန်ရက် စာမျက်နှာရဲ့ title bars ၊ ရှာဖွေရေး အင်ဂျင် ရလဒ်ပြ စာမျက်နှာတွေမှာ မြင်တွေ့ရတဲ့ စာတမ်း ဖြစ်တယ်။ ဒီစာတမ်းမှာ အက္ခရာ ၆၀ ကနေ ၈၀ အထိ ပါရှိတယ်။
• Description – ရှာဖွေရေး အင်ဂျင် အတော်များများရဲ့ ရှာဖွေမှု ရလဒ်တွေကို ဖေါ်ပြတဲ့ စာပိုဒ်တို ဖြစ်တယ်။ ဒီစာပိုဒ်မှာ အက္ခရာ ၁၀၀ ကနေ ၂၀၀ အထိ ပါရှိတယ်။
• Key words & phrases – ဒါတွေဟာ အကြောင်းအရာတွေနဲ့ ဆီလျှော်မှု ရှိရမှာ ဖြစ်ပြီး၊ ပုဒ်ထီး (comma) တွေနဲ့ ခြားပြီး ရေးသားဖို့ လိုတယ်။ သော့ချက် စာလုံးကို သုံးကြိမ်ထက် ပိုပြီး ထပ်ရေးလို့ မရဘူး။
• Alt tags – Alt tags ထဲမှာ ပါရှိတဲ့ သော့ချက် စာလုံးတွေဟာ ရှာဖွေရေး ရလဒ်တွေကို အထောက်အကူ ပေးနိုင်တယ်။

သော့ချက် စာလုံးများ - တချို့ စာလုံးတွေဟာ တခြား စာလုံးတွေထက် ပိုကောင်းတယ်

သော့ချက် စာလုံးများ (Keywords) ဆိုတာ သုံးစွဲသူတွေက သူတို့ ရှာဖွေလိုတဲ့ အကြောင်းအရာတွေကို ဖေါ်ပြဖို့ ရှာဖွေရေး အင်ဂျင်တွေထဲမှာ ရေးထည့်လိုက်တဲ့ စာလုံးတွေ ဖြစ်တယ်။ ကွန်ရက် စာမျက်နှာပေါ်မှာ အဖွဲ့အစည်းအကြောင်း၊ သင် လုပ်ဆောင်နေတဲ့ အခန်းကဏ္ဍနဲ့ ကိုက်ညီတဲ့ သော့ချက် စာလုံးတွေကို ထည့်သွင်းပါ။ နှစ်သက်တဲ့ သော့ချက် စာလုံးတွေကို သင့်ရဲ့ အဖွဲ့အစည်းက စီမံထုတ်လုပ်တဲ့ အွန်လိုင်း၊ အော့ဖ်လိုင်း အကြောင်းအရာတွေထဲမှာ ရှာဖွေပါ။

ရှင်းရှင်းလင်းလင်း မရှိပဲ ယေဘုယျဆန်တဲ့ ဝေါဟာရတွေကို မရွေးချယ်ပါနဲ့။ အကြောင်းကတော့ တခြား ကွန်ရက် စာမျက်နှာတွေက အလားတူ ဝေါဟာရတွေကို အသုံးပြုနေမှာ ဖြစ်တဲ့အတွက်၊ သင့်ရဲ့ အကြောင်းအရာကို ရှာဖွေဖို့ ပိုပြီး ခက်ခဲသွားစေနိုင်တယ်။ သင် ပစ်မှတ်ထားတဲ့ ပရိသတ်တွေက အသုံးပြုလေ့ရှိတဲ့ ရှာဖွေရေး အင်ဂျင်တွေကို ထည့်သွင်းပါ။ ဒီအချက်အလက်တွေကို ရှာဖွေဖို့ ကွန်ရက် စာမျက်နှာရဲ့ စာရင်း ဇယားတွေ (statistics) ကို အသုံးပြုနိုင်တယ်။

သော့ချက် စာလုံးတွေကို ရွေးချယ်ရာမှာ အထောက်အကူပြုတဲ့ အခမဲ့ ကိရိယာ တချို့ ရှိတယ် -
 

• Wordtracker
• Google's keyword tool

ရှာဖွေရလွယ်ကူတဲ့ လမ်းညွှန်ချက်များ

အဖွဲ့အစည်းရဲ့ ကွန်ရက် စာမျက်နှာကို ကိုယ်တိုင် တည်ဆောက်တယ် ဖြစ်စေ၊ ပြင်ပက ကန်ထရိုက်တာတွေနဲ့ တည်ဆောက်တယ် ဖြစ်စေ၊ အောက်ပါ လမ်းညွှန်ချက်တွေကို လိုက်နာပါ -
 

• ဆီလျှော်မှု ရှိပြီး အလွယ်တကူ ကြည့်ရှုနိုင်တဲ့ အကြောင်းအရာတွေက ပရိသတ်ကို ဆွဲဆောင်မှု ပေးနိုင်၊ ပရိသတ်ကို ဆက်ထိန်းထားနိုင်တဲ့ သော့ချက် ဖြစ်တယ်။ ရိုးရိုး ဘာသာစကားကို အသုံးပြုပါ။ ကွန်ရက် စာမျက်နှာပါ အကြောင်းအရာကို အလွယ်တကူ ဖတ်ရှုနိုင်ရမယ်၊ အဖွဲ့အစည်းအတွင်းမှာ သုံးစွဲလေ့ရှိတဲ့ ဗန်းစကားကို အသုံးမပြုပါနဲ့။
• အကယ်လို့ ကွန်ရက် စာမျက်နှာကို Drupal လို အကြောင်းအရာ စီမံခန့်ခွဲရေး နည်းစနစ် (CMS) တခုခုနဲ့ တည်ဆောက်ထားတယ် ဆိုရင်၊ စာမျက်နှာ အားလုံးကို ရှာဖွေရေး အင်ဂျင်တွေက ရည်ညွှန်းနိုင်အောင် URLs လို့ ခေါ်တဲ့ ကွန်ရက် လိပ်စာတွေကို ပေးထားပါ။ 'query strings' (သို့) ရည်ညွှန်းလို့ မရတဲ့ အမေး သင်္ကေတလို့ အက္ခရာတွေ ပါတဲ့ URLs တွေကို သုံးစွဲတာထက် directory structure တခုခုကို သုံးပါ။ ဥပမာ အားဖြင့် /news/document/latest.html နဲ့ အဆုံးသတ်ထားတဲ့ URL ကို /news/document/?23950.html နဲ့ အဆုံးသတ်တဲ့ URL ထက် ရှာဖွေရေး ရလဒ်တွေမှာ ပိုပြီး ဖေါ်ပြပေးနိုင်မှာ ဖြစ်တယ်။
• အရေးကြီးတဲ့ စာမျက်နှာတွေမှာ တည်မြဲတဲ့ URLs တွေ ရှိနေဖို့ လိုတယ်။
• ရှာဖွေရေး အင်ဂျင်တွေက Flash နဲ့ ပါတ်သက်တဲ့ အကြောင်းအရာတွေကို စနစ်တကျ မရှာဖွေပေးနိုင်တဲ့အတွက် Flash သုံးစွဲတာကို ရှောင်ပါ။
• ရှာဖွေရေး အင်ဂျင်တွေဟာ frames ကို အသုံးပြုတဲ့ ကွန်ရက် စာမျက်နှာတွေကို ရှာဖွေတဲ့ နေရာမှာ အခက်အခဲ ရှိတယ်။ ဒါကြောင့် ကွန်ရက် စာမျက်နှာကို ဒီဇိုင်းရေးဆွဲတဲ့အခါ frames သုံးစွဲတာကို ရှောင်ပါ။
• တခြား ကွန်ရက် စာမျက်နှာတွေနဲ့ ချိတ်ဆက်ထားတဲ့ ပင်မ စာမျက်နှာလို ချက်ခြင်း မြင်တွေ့ရတဲ့ စာမျက်နှာတွေမှာ ပါရှိတဲ့ အကြောင်းအရာတွေရဲ့ အရည်အသွေးဟာ အလွန် အရေးကြီးတယ်။ ပင်မ စာမျက်နှာတွေမှာ လူတွေ သိစေလိုတဲ့ သော့ချက် စာလုံး အတော်များများကို ထည့်သွင်းထားပါ။
• လူမှု အသင်းအဖွဲ့နဲ့ ပါတ်သက်တဲ့ ကွန်ရက် စာမျက်နှာတွေဟာ ရှာဖွေရေး အင်ဂျင်တွေမှာ အလွန် ရေပမ်းစားလာတဲ့အတွက်၊ လာရောက် ကြည့်ရှုလာတဲ့ သူတွေက ရေးသားနိုင်တဲ့ မှတ်ချက်တွေ၊ ဘလော့ဂ်တွေနဲ့ ၀ီကီတွေကို ထည့်သွင်းဖို့ စဉ်းစားပါ။
• အကယ်လို့ ကိုယ်ပိုင် ကွန်ရက် စာမျက်နှာကို တည်ဆောက်ဖို့အတွက် ပြင်ပ ကွန်ထရိုက်တာ တယောက်ယောက်နဲ့ အလုပ် တွဲလုပ်မယ် ဆိုရင်၊ ရှာဖွေရေး အင်ဂျင်ကို ဦးစားပေးပြီး သင့်မြတ်အောင် လုပ်ဆောင်ပါ။
• HTML (သို့) အကြောင်းအရာ စီမံခန့်ခွဲရေး နည်းစနစ် (CMS) မှာ ပါတဲ့ functions ကို အသုံးပြုပြီး ဖန်တီးနိုင်တဲ့ ခေါင်းစည်း စာတမ်း (tags) လို့ခေါ်တဲ့ 'Semantic mark-up' က ရှာဖွေရေး အင်ဂျင်ကို တချို့ အစိတ်အပိုင်းတွေဟာ တခြား အစိတ်အပိုင်းတွေထက် ပိုပြီး အရေးကြီးတဲ့အကြောင်း ပြောပြပေးတယ်။ ဒါကြောင့် အဲဒါတွေကို အစမ်း သုံးစွဲကြည့်ပါ။

ဝင်ရောက်သုံးစွဲနိုင်မှု

ကွန်ရက် စာမျက်နှာတခုကို သုံးစွဲသူ အတော်များများက ၀င်ရောက်သုံးစွဲနိုင်အောင် ဖန်တီးပေးတာဟာ မသန်မစွမ်းတဲ့ သူတွေအတွက်လည်း ကောင်းမွန်တဲ့ အလေ့အထ ဖြစ်သလို၊ ရှာဖွေရေး အင်ဂျင်ရဲ့ ရလဒ်တွေကို တိုးတက် ကောင်းမွန်စေတယ်။ ယျေဘုယျ အားဖြင့် အင်တာနက် အကြောင်းအရာတွေကို လူတွေ ပိုမို ၀င်ရောက်သုံးစွဲနိုင်အောင် လုပ်ဆောင်ပေးတယ်။

လိုက်နာရမဲ့ ၀င်ရောက်သုံးစွဲမှု လမ်းညွှန်ချက်တွေကို The World Wide Web Consortium (W3C) က ပြုစုထားတယ်။

WAVE လို ကွန်ရက်စာမျက်နှာအတွင်း ၀င်ရောက် သုံးစွဲနိုင်မှုကို တိုးတက် ကောင်းမွန်အောင် အထောက်အကူ ပေးတဲ့ အရင်းအမြစ်တွေကို အွန်လိုင်းမှာ အများအပြား ရရှိနိုင်တယ်။

အချိန်အဆက်လုပ်တဲ့ နည်းဗျူဟာများ

ကွန်ရက် စာမျက်နှာကို သင့်မြတ်မှု ရှိအောင် ပရိုဂရမ် ရေးဆွဲထားသလို၊ သင့်ရဲ့ ကွန်ရက် စာမျက်နှာကို တခြား ကွန်ရက် စာမျက်နှာတွေနဲ့ ချိတ်ဆက်ထားပါ။ ဒီနည်းနဲ့ ရှာဖွေရေး ရလဒ်တွေမှာ ထိပ်ပိုင်းနေရာမှာ ရောက်ရှိလာမှာ ဖြစ်တယ်။ အထူးသဖြင့်၊ ရှာဖွေရေး အင်ဂျင်တွေဟာ ဂုဏ်အသရေ ရှိပြီး၊ အရည်အသွေးမြင့်မားတဲ့ ကွန်ရက် စာမျက်နှာတွေရဲ့ links တွေကို ရှာဖွေလေ့ ရှိကြတယ်။ အကယ်လို့ သင့်ရဲ့ ကွန်ရက် စာမျက်နှာကို ချိတ်ဆက်ထားတဲ့ တခြား ကွန်ရက် စာမျက်နှာ အရေအတွက်ကို သိချင်ရင်၊ သင့်ရဲ့ ကွန်ရက် စာမျက်နှာ လိပ်စာကို Google မှာ ရေးထည့်လိုက်ပါ။ သင့်ရဲ့ ကွန်ရက် စာမျက်နှာကို ချိတ်ဆက်နေတဲ့ စာမျက်နှာတွေရဲ့ အသေးစိတ် အချက်အလက်တွေကို ဖေါ်ပြပေးမှာ ဖြစ်တယ်။ ဒီနည်းနဲ့ သင် နှစ်သက်တဲ့ အဖွဲ့အစည်း အတော်များများရဲ့ links တွေကို ရွေးချယ်နိုင်မှာ ဖြစ်တယ်။

သင် စမ်းသပ်ကြည့်နိုင်တဲ့ အချက်များ -
 

• မိတ်ဖက် အဖွဲ့အစည်းတွေနဲ့ links တွေကို ဖလှယ်ပါ၊ (သို့) သင်နဲ့ links တွေကို အချင်းချင်း ဖလှယ်နိုင်တဲ့ အဖွဲ့အစည်းတွေကို သော့ချက် စာလုံးတွေနဲ့ ရှာဖွေပါ။
• သင့်ရဲ့ ကွန်ရက်စာမျက်နှာကို သင့်ကို ထောက်ခံအားပေးတဲ့ သူတွေက လူမှု ဆက်ဆံရေး ကွန်ရက်တွေ၊ ဘလော့ဂ်တွေမှာ အချိတ်အဆက် လုပ်ပေးဖို့ တိုက်တွန်းနိုင်တယ်။
• တခြား လူတွေရဲ့ ဘလော့ဂ်တွေမှာ မှတ်ချက်တွေ ပေးပြီး၊ အဲဒီ မှတ်ချက်ထဲမှာ သင့် ကွန်ရက် စာမျက်နှာရဲ့ links တွေကို ထည့်သွင်းထားနိုင်တယ်။

အရင်းအမြစ်များ
အောက်ပါ ကွန်ရက် စာမျက်နှာတွေဟာ ရှာဖွေရေး အင်ဂျင် သင့်မြတ်မှု (search engine optimisation) အကြောင်းကို ပိုမို နားလည်စေနိုင်တယ် -
Idealware - ရှာဖွေရေး အင်ဂျင်တွေသုံးပြီး ရှာဖွေတွေ့ရှိနိုင်မှု
Idealware က ရေးသားတဲ့ ဆောင်းပါး တပုဒ်၊ အင်ဂျီအို နည်းပညာ ပံ့ပိုးရေး ဌာနက ခေါင်းဆောင် တဦး၊ ကွန်ရက် စာမျက်နှာမှာ ပါတဲ့ အကြောင်းအရာနဲ့၊ ဖွဲ့စည်း တည်ဆောက်ပုံတွေဟာ လူတွေက ရှာဖွေရေး အင်ဂျင်တွေကနေ အလွယ်တကူ တွေ့ရှိနိုင်အောင် သက်ရောက်မှု ကြီးကြီးမားမား ဖြစ်စေတယ်။ ကွန်ရက် စာမျက်နှာပါ အကြောင်းအရာကို ရှာဖွေရေး အင်ဂျင်တွေက တွေ့ရှိပြီး ဦးစားပေး ဖေါ်ပြလာအောင် လုပ်ဆောင်နိုင်တဲ့ အဆင့် ၁၀ ချက် ပါရှိတယ်။
 
Idealware – SEO လို့ ခေါ်တဲ့ ရှာဖွေရေး အင်ဂျင် သင့်မြတ်မှု ရှိအောင် လိုအပ်တဲ့ CMS Features များ
ကွန်ရက် စာမျက်နှာကို စီမံထိန်းသိမ်းရာမှာ သင့် အဖွဲ့အစည်းက အသုံးပြုတဲ့ CMS ခေါ် အကြောင်းအရာ စီမံ ခန့်ခွဲရေး နည်းစနစ်က ရှာဖွေရေး အင်ဂျင် သင့်မြတ်မှုကို အထောက်အကူ ပေးတဲ့ အတိုင်းအတာနဲ့ ပါတ်သက်တဲ့ အချက်အလက်တွေ ပါဝင်တယ်။
 
SEO မိတ်ဆက် - အကျိုးအမြတ် မယူတဲ့ SEO လမ်းညွှန်
 
Good Keywords – ကွန်ရက် စာမျက်နှာတွေမှာ သုံးစွဲမဲ့ အကောင်းဆုံး သော့ချက် စာလုံးတွေကို ရှာပါ။
Good Keywords ဟာ မိမိရဲ့ ကွန်ရက် စာမျက်နှာတွေနဲ့ ကိုက်ညီတဲ့ သော့ချက် စာလုံးတွေကို ရှာဖွေပေးနိုင်တဲ့ အခမဲ့ ၀င်းဒိုး ဆော့ဗ်ဝဲ ဖြစ်တယ်။
ရှာဖွေရေး အင်ဂျင် သင့်မြတ်စေခြင်း မိတ်ဆက် – ရှာဖွေရေး အင်ဂျင်စောင့်ကြည့်ရေး အဖွဲ့
ဒီနယ်ပယ်မှာ ပါဝင်တဲ့ အကောင်းဆုံး ကွန်ရက် စာမျက်နှာတွေထဲမှာ တခု အပါအ၀င်ဖြစ်ပြီး ရှာဖွေရေး အင်ဂျင် သင့်မြတ်စေမှု အသေးစိတ် လမ်းညွှန်ချက် ဖြစ်တယ်။
 
webmasters တွေအတွက် Google ရဲ့ ကိုယ်ပိုင် ကွန်ရက် စာမျက်နှာ 
ဒီကွန်ရက် စာမျက်နှာမှာ သင့်ရဲ့ ကွန်ရက် စာမျက်နှာ ပိုမို ကောင်းမွန်အောင်၊ လာရောက်ကြည့်ရှုမှု ပိုတိုးလာအောင်၊ လာရောက် ကြည့်ရှုသူတွေနဲ့ အဆက်အသွယ် လုပ်နိုင်တဲ့ သင့်လျှော်တဲ့ နည်းနာတွေကို မိတ်ဆက်ပေးထားတယ်။
( သတင်းဆက်သွယ်ရေး-သတ္တာမှကူးယူဖော်ပြသည်။)